मङपुमा घर जलेर खरानी

रेसेप ग्राम पंचायत अन्तर्गत पर्ने रम्बी बीचकमान भैसीटार निवासी कुमार छेत्रीको घर सर्ट सर्किटको कारण जलेर खरानी भएको छ | उक्त घटना हिज राती १ बजे घटेको परिवार सुत्रले जनाएको छ | घरमा कोही पनि नभएको समय उक्त घटना घटेकोले घरबाट लगाएको लुगाफाटा बाहेक केहि पनि निकाल्न नसकिएको घर मालिक कुमार छेत्रीले जनाएको छ | घरमा पालेको गाई, बाख्रा कराएपछि छिमेकीहरुले थाहा पाएर आगोलाई निभाउने कोशिष गरेता पनि आगोले उग्ररुप लिएको कारण आगो निभाउन नसकिएको परिवार सुत्रले जनाएको छ | घटना भएको १२ घण्टा बितिसक्दा पनि सरकारी तौरमा कोहि पनि निरीक्षण गर्न नआएको परिवार पक्षले जानकारी गराए | घटनापछि अग्नी पिडित परिवारले मङपु पुलिस आउटपोस्ट अनि तक्दाह खण्ड कार्यलयमा प्रथामिकी दर्तागरिसकेको छ भने घर मालिक सिक्किममा कार्यरत रहेको कारण घटना भएको समय कुमार छेत्री अनि उनको पत्नी कपिला छेत्री सिक्किममा नै रहेको साथै दुई छोराहरु अनोष छेत्री र अबी छेत्री खर्साङमा  रहेको परिवार सुत्रले जनाएको छ | काठको घर भएको कारण सर्ट सर्किटको कारण नै घरमा आगलागी भएको हुन सक्ने गाउँलेहरुले बताएको छ | मङपु क्षेत्रमा  कुनै पनि क्षण  अग्नि दुर्घटना  हुने हुनाले यहाँ अग्नीसमन केन्द्र हुनु पर्ने स्थानीय जनताले सम्बन्धित विभागप्रति मांग गरेको छ |