मङपु सिम्बिडियम अर्किड पार्कमा पर्यटकहरुको भीड | यस बर्ष देखि कालो अर्किड पनि रोपिएको जानकारी

मङपु१७अप्रेल(केशर मोक्तान)

मङपु रङबी बीचकमानमा अवस्थित सिम्बिडियम  अर्किड पार्कमा हालमा पर्यटकहरुको भीड दिन प्रतिदिन बड़दै गईरहेको छ | राज्यभित्रको मात्र नभएर देश विदेशका  पर्यटकहरु यहाको अर्किड र मनोरम दृश्य हेर्न भीड़ लाग्न थालेका छन् | सिन्कोना बगान निर्देशकको पहलमा शुरु गरिएको उक्त अर्किड पार्कमा तीस हजार भन्दा अधिक अर्किडहरु लगाएको छ |  फूल उत्पादक एवं स्थानीय मालीहरु पुस्कर सिंगर,रबि राई अनि सतीश राईको प्रयासमा यस  सिम्बिडियम अर्किड पार्कको पूर्णरुपले देखरेख भइरहेको छ | यी युवाहरुले सिन्कोना बगानको पक्षबाट आफूले फुलाएको अर्किड सुनखरी राष्टिय स्तरको पुष्प प्रदर्शनीमा  पनि लगेर धेरैवटा पदक जीतेर ल्याएका बताउछन् | उनीहरुले फुलाएको अर्किड फूल देखेर कोलकत्ताको एक जना पर्यटकले आँखाभरि आशु सम्म झारेको कुरो फूल उत्पादक पुस्कर सिंगर जनाउछन् |  हालमा यस अर्किड पार्कमा एम.सीरिस,डी.सीरिस,अनि अस्ट्रेलियण भेराइटी गरि जम्मा ४५ प्रकारको अर्किड रोपिएको छ भने यस बर्ष देखि कालो अर्किड पनि रोपिएको जानकारी फूलमालीहरुले दिएका छन् | फलत:यी तीन सिन्कोना श्रमिक युवाहरुको दिनरातको परिश्रम कारण  आज यस ठाउँ पर्यटन स्थलको प्रबल सम्भावना देखा परेको छ | उक्त  सिम्बिडियम अर्किड पार्कको उद्घाटन तीन अप्रेलको दिन जी.टी.ए.प्रमुख बिमल गुरुङको उपस्थितिमा कालेबुङ नगरपालिका अध्यक्ष एल.बी.परिवारको बाहुलीबाट गरे पछि उक्त अर्किड पार्कलाई जी.टी.ए.को पर्यटन मानचित्रमा गाभ्ने जी.टी.ए.प्रमुखले घोषणा गरिसकेका छन् | दा.गो.पा.प्.को २१ बर्षे शासनकालमा पर्यटनको मानचित्रबाट  बिमुख बनेको मङपुले अब जी.टी.ए.प्रमुखको  आस्वाशन पछि जी.टी.ए.को पर्यटन मानचित्रमा स्थान पाउला कि भन्ने स्थानीय जनताले आशा साचेर बसेका  छन् | मङपुमा बाहिरबाट पर्यटकहरु आएर बस्न चाहे आज यहाँ एउटै पनि गेस्ट हाउस  नभएको कारण पर्यटकहरु बिचल्नीमा परिरहेकोछ |  यसर्थ यस दिशा तर्फ पनि सम्बन्धित  बिभागले ध्यान दिएर गेस्ट हाउस निर्माण गर्न नितान्त अवश्यक देखिन्छ | मङपुमा पर्यटन विस्तार गर्नुको निम्ति स्थानीय बासिन्दाहरुले पनि सानो सानो स्टे-हाउस निर्माण गरे यहाँ पर्यटन बिस्तारको निम्ति धेरै नै सहयोग हुने  छाट देखिन्छ |